23.03.2021 ҳокими шаҳри Тошканд Ҷаҳонгир Ортиқхӯҷаев ҷиҳати анҷом додани сафари корӣ ба пойтахти Ҷумҳурии Тоҷикистон — шаҳри Душанбе ташриф овард. Дар фурӯдгоҳи байналмилалии пойтахт ҳокими шаҳри Тошкандро муовини аввали Раиси шаҳри Душанбе Қурбонзода Амирхон ва дигар шахсони расмӣ истиқбол гирифтанд. Дар ин бора ба АМИТ «Ховар» аз Мақомоти иҷроияи ҳокимияти давлатии шаҳри Душанбе хабар доданд.
Дар доираи сафари корӣ мулоқоти ҳокими шаҳри Тошканд Ҷаҳонгир Ортиқхӯҷаев бо Раиси шаҳри Душанбе муҳтарам Рустами Эмомалӣ баргузор гардид. Раиси шаҳри Душанбе роҳбарияти шаҳри Тошкандро ба пойтахти Тоҷикистон хайрамақдам гуфтанд.
Зимни мулоқот ҷонибҳо аз раванди вусъатёбандаи муносибатҳои дӯстӣ ва ҳамкории судманд миёни Тоҷикистону Ӯзбекистон изҳори қаноатмандӣ намуданд.
Таъкид шуд, ки ба шарофати иродаи сиёсии сарони ҳар ду кишвари бародар Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон ва Президенти Ҷумҳурии Ӯзбекистон муҳтарам Шавкат Мирзиёев ҳамкории гуногунҷанба ба сатҳи сифатан нави шарикии стратегӣ бароварда шуда, бемайлон густариш меёбанд.
Дар ҷараёни мулоқот масоили мушаххаси тавсеаи робитаҳои мутақобилан судманди байни пойтахтҳои ҳарду давлат-шаҳрҳои Душанбе ва Тошканд мавриди муҳокима қарор гирифтанд.
Таваҷҷуҳи махсус ба масъалаҳои ба роҳ мондани тамосу муколамаи мунтазам ҷиҳати табодули таҷриба дар соҳаи шаҳрдорӣ ва рушди инфрасохтор‚ татбиқи лоиҳаҳои муштараки ҳамкориҳо ва барномаҳои равобити фарҳангию гуманитарӣ зоҳир карда шуд.
Бояд тазаккур дод, ки шаҳри Душанберо бо пойтахти Ҷумҳурии Ӯзбекистон робитаҳои неки ҳамҷаворӣ, ҳамкории мутақобилан судманд ва дигар умумиятҳо ба ҳам мепайвандад.
Ҳамчунин Ҳокими шаҳри Тошканд дар доираи сафари худ аз Корхонаи истеҳсоли обҳои ташнашикани «Сиёма» дидан намуд.
Маврид ба зикр аст, ки Корхонаи мазкур дар доираи дастуру ҳидоятҳои Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бунёд ёфта, имконият дорад, ки дар як сол ба ҳисоби як басти корӣ 33 миллион литр обро истеҳолу ба харидорон пешниҳод намояд. Иншооти мазкур бо муосиртарин хатҳои истеҳсолӣ таъмин гардида, сифати ҳамаҷонибаи маҳсулоти омодашударо дастгоҳҳои насбшуда таъмин хоҳанд кард.
Зимни шиносоӣ ҳокими шаҳри Тошканд ба маҳсулоти истеҳсолнамудаи корхонаи мазкур баҳои баланд дода, иқдоми роҳбарияти шаҳри Душанберо хеле муҳиму саривақтӣ арзёбӣ намуд.
Ҳокими шаҳри Тошканд Ҷаҳонгир Ортиқхӯҷаев ба дастовардҳои шаҳри Душанбе тайи солҳои соҳибистиқлолӣ мароқ зоҳир намуда, ба рушди босуръати самту соҳаҳо дар пойтахт, аз ҷумла қомат афрохтани биноҳои хуштарҳу замонавӣ, роҳҳои ҷавобгӯ ба талаботи имрӯза, боғу гулгаштҳои зебову диданӣ баҳои баланд дод.
Бо ҳамин сафари кории ҳокими шаҳри Тошканд Ҷаҳонгир Ортиқхӯҷаев ба пойтахти Ҷумҳурии Тоҷикистон — шаҳри Душанбе, ки ба таҳкиму густариши муносибатҳои неки ҳамкории минбаъда заминаи мустаҳкам гузошта, ба ҷашни ҳақиқии дӯстии мардумони ду кишвари бародар табдил ёфт, ба анҷом расид.
/АМИТ «Ховар»/. Хабар медиҳад.
Обуна шавед Viber
Обуна шавед Telegram
Илова кунед
