Тоҷикистон ва Чин ҳамкориҳоро дар самтҳои иқтисод ва технологияҳои рақамӣ густариш медиҳанд

2 сентябр дар шаҳри Пекин мулоқоти Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон бо Раиси Ҷумҳурии Мардумии Чин Си Ҷинпин баргузор гардид. Дар рафти вохӯрӣ доираи васеи масъалаҳои ҳамкории дуҷониба ва бисёрҷониба, аз ҷумла дар доираи созмонҳои байналмилалӣ ва минтақавӣ мавриди баррасӣ қарор гирифт.

Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон саҳми Раиси Ҷумҳурии Мардумии Чин муҳтарам Си Ҷинпинро дар тавсеаи ҳамкориҳои гуногунҷабҳаи байни ду кишвар баланд арзёбӣ намуд. Таъкид шуд, ки Чин ба шарики асосии тиҷоратии Тоҷикистон табдил ёфтааст.

Президенти Тоҷикистон изҳор дошт, ки новобаста аз вазъи мураккаби геополитикӣ, Созмони Ҳамкории Шанхай (СҲШ) ба таъмини амният, субот ва рушди муносибатҳои мутақобилан судманд саҳми назаррас мегузорад.

Сарвари давлати мо ташаббуси «Идоракунии глобалӣ»-ро, ки аз ҷониби Си Ҷинпин пешниҳод шудааст, дастгирӣ намуда, онро мутобиқ ба талошҳои ҷониби Тоҷикистон дар самти таҳкими волоияти қонун, сулҳ, амният ва рушди устувор арзёбӣ кард. Ин ташаббус дорои иқтидори бузург барои расидан ба ҳадафҳои муштарак мебошад.

Ҷонибҳо аз такмили механизмҳои ҳамкорӣ дар формати «Осиёи Марказӣ – Чин» изҳори қаноатмандӣ карданд.

Ба густариши ҳамкорӣ дар соҳаҳои иқтисод, рақамисозӣ, рушди инфрасохтори нақлиёт ва логистика, истифодаи самараноки имкониятҳои транзитӣ, инчунин ҷалби сармоягузорӣ ва технологияҳои Чин ба иқтисодиёти Тоҷикистон таваҷҷуҳи махсус зоҳир гардид.

Ҷонибҳо аҳамияти рушди робитаҳои байниминтақавӣ ва тавсеаи ҳамкорӣ дар соҳаҳои фарҳанг, маориф, илм, техника ва сайёҳиро таъкид намуданд.

Ҳамчунин, зикр гардид, ки Тоҷикистон ва Чин дар масъалаҳои таъмини амният ва муқовимат бо таҳдидҳои муосир мавқеи наздик доранд.

asiaplustj.info Хабар медиҳад.

Илова кунед